Co fin de achegar os máis cativos do barrio o Entroido da Provincia de Ourense, ó longo do mes de febreiro, levamos a cabo dentro do Programa Construíndo Comunidade, distintas actividades entroideiras para promocionar o seu coñecemento entre as crianzas.
Para isto guiámonos polo ciclo do Entroido, que ten nas diferentes vilas de Galiza distintas extensións. Tomamos como referencia o entroido que ten a súa distribución en cinco semanas, común a boa parte das comarcas ourensás. Non se trata do ciclo máis longo, pois este é o de Laza onde o ciclo comeza segundo se dan as badaladas o día de ano novo co primeiro folión. Tamén son en ocasións máis longos que o entroido de Xinzo da Limia ou o de Maceda, o entroido de Verín e o entroido de Vilariño de Conso, segundo en que momento de febreiro ou marzo caia o entroido pois en Verín o ciclo dá comezo o día de San Antón (17 de xaneiro) e en Vilariño de Conso o ciclo dá comezo o día de Candelas (2 de febreiro).
Realizamos as actividades, facendo un repaso ás máscaras de cada zona da provincia e percorrendo ás súas datas principais: Domingo fareleiro, Domingo oleiro, Xoves de compadres, Domingo corredoiro, Xoves de comadres, Domingo de entroido, Luns de entroido, Martes de entroido, Mércores de cinza i enterro da xardiña, e o Domingo de piñata.
xeraccion.com 